نفاذ قومی زبان تحریک پاکستان کا نامکمل ایجنڈا ہے، قومی زبان اُردو کا نفاذ ہماری قومی اتحاد و یکجہتی، معاشی ترقی کی ضامن اور دفاعی حکمت عملی میں کلیدی حیثیت رکھتی ہے، قومی زبان کے فوری نفاذ سے دانستہ گریز بانی پاکستان قائداعظم کے افکار سے روگردانی اور دستور پاکستان کی کھلی توہین ہے
رپورٹ: میر افسر امان
نفاذ قومی زبان تحریک پاکستان کا نامکمل ایجنڈا ہے۔ قومی زبان اُردو کا نفاذ ہماری قومی اتحاد و یکجہتی، معاشی ترقی کی ضامن اور دفاعی حکمت عملی میں کلیدی حیثیت رکھتی ہے۔ قومی زبان کے فوری نفاذ سے دانستہ گریز بانی پاکستان قائداعظم کے افکار سے روگردانی اور دستور پاکستان کی کھلی توہین ہے۔ ان خیالات کا اظہار مقررین نے قائداعظم کے یوم پیدائش پر تحریک نفاذ اُردو کے زیراہتمام راولپنڈی آرٹس کونسل میں قائداعظم کا تصور قومی زبان کے موضوع پر سیمینار سے خطاب کرتے ہوئے کیا۔ ممتاز شاعر اور ماہر تعلیم پروفیسر جمیل عالی تقریب کے صدر جبکہ ڈاکٹر محمد افضل راؤ سابق وائس چانسلر جامعہ اسلامیہ بہاولپور مہمان خصوصی تھے۔ سیمینار سے ڈاکٹر نعیم اکرم، ڈاکٹر صغیراحمد، ڈاکٹر ساجد خاکوانی، تحریک کے سرپرست محمد اسلم الوری، مرکزی نائب صدر سید ظہیر گیلانی، تحریک کے صدر عطا الرحمان چوہان نے خطاب کیا۔ ڈاکٹر افضل راؤ نے قومی زبان اُردو کو مسلح افواج اور تمام صوبوں میں رابطے کی واحد زبان کی بدولت اسے قومی دفاع کی ضمانت قرار دیا۔ انہوں نے کہا کہ مٹھی بھر اشرافیہ نے اپنے مذموم مقاصد کے لئے نفاذ اردو کا راستہ روک رکھا ہے جس سے ملک میں جہالت، غربت اور معاشی پسماندگی میں مسلسل اضافہ ہورہا ہے۔ ممتاز ادیب، شاعر، دانشور پروفیسر جمیل عالی نے کہا کہ نفاذ اردو ایک طبقاتی مسئلہ بن چکا ہے۔ مقتدر طبقہ اور اشرافیہ قومی زبان میں اظہار خیال کی استعداد پیدا کرنے کی بجائے اس کو ذریعہ تعلیم اور سرکاری زبان بنانے کے دستوری تقاضوں پر عمل درآمد میں رکاوٹیں پیدا کررہے ہیں۔ انہوں نے اردو کو فوری طور پر علوم و فنون کے لئے ذریعہ تعلیم بنانے، سرکاری دفاتر میں دفتری زبان کے طور پر نافذ کرنے اور مقابلے کے امتحانات انگریزی کے ساتھ اردو میں لئے جانے کا مطالبہ کیا۔ تحریک کے سرپرست اسلم الوری نے کہا کہ اُردو دنیا کی ترقی یافتہ زبانوں میں شمار ہوتی ہے اور یہ عالم اسلام میں سب سے زیادہ بولی اور سمجھی جانے والی زبان ہے۔ اردو کو ریاستی زبان اور ذریعہ تعلیم بناکر ہم قومی زبان کے دامن میں پنہاں لسانی توانائی کو قومی ترقی کے لئے بروئے کار لاسکتے ہیں۔ اس موقع پر مقابلہ مضمون نویسی میں نمایاں پوزیشن لینے والے طلبہ وطالبات کو نقد انعامات اور اسناد بھی پیش کی گئیں۔
قائداعظم کے یوم پیدائش پر تحریک نفاذ اُردو کے زیراہتمام سیمینار قائداعظم محمد علی جناح کا تصور قومی زبان
