یوم دفاع پر قوم کے نمائندے ہر شہید کے گھر جائیں گے۔۔ ترجمان پاک فوج

پاک فوج کے ترجمان میجر جنرل آصف غفور نے کہا ہے کہ اس بار یوم دفاع منفرد انداز میں منائیں گے، یوم دفاع کا عنوان ہوگا ’’ہمیں پیار ہے پاکستان سے‘‘ قوم کے نمائندے ہر شہید کے گھر جا کر لواحقین سے اظہارِ تشکر کریں گے، یوم دفاع پر ہمارے تمام شہدا نظر آئیں گے، تعلیمی اداروں اور ہر چھاؤنی میں تقاریب ہوں گی، جی ایچ کیو سے مرکزی تقریب براہ راست نشر ہوگی، شاپنگ مال شہیدوں کو تصاویر سے سجائے جائیں گے اور بسوں، ویگنوں، ٹرکوں، پرائیویٹ گاڑیوں، ٹرینوں، اسٹیشوں اور تمام ایئرپورٹس پر شہداء کی تصاویر لگائی جائیں گی۔ سماجی رابطے کی ویب سائٹ پر جاری بیان اور ویڈیو پیغام میں میجر جنرل آصف غفور نے کہا کہ اس بار یوم دفاع منفرد انداز میں منانے کا فیصلہ کیا گیا ہے، اس دن قوم کے نمائندے ہر شہید کے گھر جائیں گے اور شہیدوں کے لواحقین کا شکریہ ادا کیا جائے گا۔ انہوں نے کہا کہ پاکستان کے ہر طبقے کے فرد نے پچھلے 70 سال میں بہت زیادہ قربانیاں دی ہیں، جن میں ایک ریڑھی والے سے لے کر مسلح افواج کے جوان اور دیگر افراد بھی شامل ہیں۔ میجر جنرل آصف غفور کا کہنا تھا کہ پچھلے پندرہ بیس سال میں جتنی قربانیاں ہم نے دی ہیں اتنی کسی اور ملک نے نہیں دیں، لہٰذا ہم نے سوچا کہ اس مرتبہ یوم دفاع منفرد انداز سے منایا جائے۔ ڈی جی آئی ایس پی آر کے مطابق 6 ستمبر کو میڈیا اور عوامی نمائندے ہر شہید کے گھر جائیں اور انہیں احساس دلائیں کہ آپ کے شوہر، بھائی، باپ، بیٹے نے ملک کے لئے قربانی دی، اس طرح لوگوں میں احساس پیدا ہوگا۔ میجر جنرل آصف غفور کا کہنا تھا کہ 6 ستمبر کو ہمارا ہر شہید سب کو نظر آئے گا، اس حوالے سے مرکزی تقریب جنرل ہیڈکوارٹر (جی ایچ کیو) میں ہوگی، جسے براہ راست نشر کیا جائے گا۔ آئی ایس پی آر کے مطابق یوم دفاع کے سلسلے میں افواجِ پاکستان ہتھیاروں کی نمائش بھی کرے گی، تعلیمی اداروں میں شہدا کی یاد اور وطن سے محبت کی تقریبات ہوں گی اور افواجِ پاکستان کے شہدا کے لواحقین اور غازیوں کے لئے ہر چھاؤنی میں دن کے وقت تقاریب ہوں گی۔ ڈی جی آئی ایس پی آر نے قوم سے اس دن بھرپور شمولیت کی درخواست کرتے ہوئے کہا کہ آیئے زندہ قوم کی طرح اپنے شہداء کو یاد رکھیں۔