بھارتی فوجیوں میں خودکشی کا رجحان، 9 برسوں میں ایک ہزار 22 نے خودکشی کی

بھارتی فوجی افسران اور جوان اپنی زندگیوں کا خاتمہ خود کرنے لگے، 2009ء سے اب تک 9 برسوں میں ایک ہزار 22 بھارتی فوجیوں نے خودکشی کی۔ 2014ء سے 2017ء کے درمیان 425 جبکہ 2009ء سے 2013ء کے درمیان 597 فوجیوں نے اپنے آپ کو مار ڈالا۔ گزشتہ چار برسوں میں آرمی میں 9 افسران اور 326 جوانوں جبکہ فضائیہ میں 5 افسران اور 67 ایئرمینوں نے خودکشی کی۔ اس عرصے میں بحریہ میں سب سے کم خودکشیاں دیکھنے میں آئیں جہاں 2 افسران اور 16 سیلرز نے اپنی زندگی کا خاتمہ کیا۔ گزشتہ چار برس میں مسلح افواج میں خودکشی کے واقعات کے یہ اعدادوشمار بھارتی پارلیمنٹ کے سامنے رکھے گئے۔ وزیر مملکت برائے دفاع سبھاش بھامر نے کہا کہ 2016ء میں 129، 2014ء میں 109، 2015ء میں 95 اور 2017ء میں 92 فوجیوں نے خودکشی کی۔ دسمبر 2017ء کے آغاز میں بھارتی اخبار ’’ٹائمز آف انڈیا‘‘ نے اپنی رپورٹ میں کہا کہ بھارت میں ہر سال 1600 فوجی جوان جنگ کا حصہ بنے بغیر ہلاک ہوجاتے ہیں۔