پاکستان میں دہشتگردوں کی فنڈنگ روکنے کے نظام میں خامیاں ہیں، امریکا

امریکی صدر ڈونلڈ ٹرمپ کی خصوصی معاون اور نیشنل سیکورٹی کونسل کی ڈائریکٹر لیزا کرٹس نے دورہ پاکستان کے دوران کہا ہے کہ پاکستان میں دہشتگردوں کی فنڈنگ روکنے کے نظام میں خامیاں ہیں جبکہ اسے حقانی نیٹ ورک کے مسئلہ پر بھی توجہ دینی چاہئے۔ امریکی سفارتخانہ کی طرف سے جاری بیان کے مطابق امریکی صدر ڈونلڈ ٹرمپ کی خصوصی معاون اور نیشنل سیکورٹی کونسل کی سینئر ڈائریکٹر برائے جنوبی و وسطی ایشیا لیزا کرٹس کی سربراہی میں وفد نے پاکستان کا دورہ کیا۔ لیزا کرٹس نے وزیر داخلہ احسن اقبال، چیف آف جنرل اسٹاف لیفٹیننٹ جنرل بلال اکبر اور سیکریٹری خارجہ تہمینہ جنجوعہ سے ملاقاتیں کی۔ لیزا کرٹس نے دہشتگردی کے خلاف لڑائی میں پاکستان کی نمایاں قربانیوں کا اعتراف کیا۔ اس موقع پر لیزا کرٹس نے کہا کہ پاکستان اپنی زمین پر حقانی نیٹ ورک اور دیگر دہشتگردوں کی موجودگی کے مسئلہ پر توجہ دے، پاکستان میں منی لانڈرنگ و دہشتگردوں کی فنڈنگ روکنے کے نظام کے نفاذ میں خامیاں ہیں۔ لیزا کرٹس نے کہا کہ امریکا پاکستان کے ساتھ مشترکہ عزم پر مبنی نئے تعلقات کی جانب گامزن ہونا چاہتا ہے، علاقائی استحکام و سلامتی کیلئے دونوں ممالک مل جل کر دہشتگرد گروہوں کو شکست دیں گے۔ امریکا کی سینئر ڈائریکٹر کا کہنا تھا کہ دہشتگرد گروہ افغانستان کے پُرامن مستقبل کے مشترکہ خواب کیلئے بھی خطرہ ہیں، افغانستان میں قیام امن افغانیوں کی باعزت وطن واپسی میں مدد ثابت ہوگا، امریکی حکمت عملی کے ذریعے افغانستان میں امن کا موقع جنوبی ایشیا میں داعش کوشکست دینے اور دہشتگردوں کے خاتمے میں مددگار ثابت ہوگا، جنوبی ایشیا کے بارے میں امریکی حکمت عملی مستحکم و پُرامن افغانستان کے قیام کے موقع کی عکاس ہے۔ خیال رہے کہ امریکی وفد نے ایسے موقع پر دورہ کیا ہے جب ایک ہفتہ قبل امریکا نے پیرس میں فنانشل ٹاسک فورس کے اجلاس میں پاکستان کو دہشتگردوں کیلئے مالی معاونت کرنے والے ممالک کی واچ لسٹ میں رکھنے کی قرارداد پیش کی تھی۔ پاکستان کو اس فہرست میں شامل نہیں کیا گیا تاہم رپورٹس کے مطابق پاکستان کو جون تک مہلت دی گئی ہے جس کے بعد معاملے کا ازسرنو جائزہ لیا جائے گا۔