پاکستان اور سعودیہ کے درمیان16.1 ملین ڈالر کے معاہدوں پر دستخط

پاکستان اور سعودیہ کے درمیان 16.1 ملین ڈالر کے تین معاہدوں پردستخط کئے گئے۔ وفاقی وزیر خزانہ اسد عمر سے سعودی فنڈ برائے ترقی کے چیئرمین اور ولی عہد کے مشیر عامراجل فالخطیب کی قیادت میں چھ رکنی وفد نے وزارت خزانہ میں 27 ستمبر 2018ء کو ملاقات کی، وفد میں سعودی فنڈ برائے ترقی کے سینئر افسران شامل تھے، دونوں ممالک کے درمیان 16.1 ملین ڈالر کے تین معاہدوں پردستخط کئے گئے، اس موقع پر پاکستان میں سعودی عرب کے سفیر نواف سعید المالکی بھی موجود تھے۔ وزیرخزانہ نے سعودی وفد کے ساتھ ملاقات میں دوطرفہ برادرانہ تعلقات کو مضبوط بنانے کے حوالے سے تبادلہ خیال کیا۔ اس دوران سعودی فنڈ برائے ترقی کے تحت جاری منصوبوں پر تبادلہ خیال کیا گیا، ان منصوبوں پر کام کی رفتار کو تیز کرکے مکمل کرنے کے حوالے سے بھی جائزہ لیا گیا۔ وزیرخزانہ نے حکومت پاکستان کے ساتھ سعودی فنڈ برائے ترقی کے ترقیاتی شراکت دار ہونے کے کردار کی تعریف کی، دونوں اطراف سے آزاد جموں و کشمیر اور خیبرپختونخوا میں صحت اور تعلیم کے تین منصوبوں کے اجراء کے لئے مفاہمت کی یادداشت پر بھی دستخط کئے گئے۔