بجلی کا کرب

ڈاکٹر لال خان
دو ہزار تیرا میں ’’بھاری مینڈیٹ‘‘ کے ساتھ برسراقتدار آنے والی مسلم لیگ (ن) کی حکومت پْرانتشار اور غیرمستحکم حکومتوں میں سے ایک رہی ہے۔ اپوزیشن جماعتوں بالخصوص تحریک انصاف کی جانب سے نان ایشوز کی بھرمار دراصل حکومت کی طاقت کا ہی باعث بن رہی ہے۔ درحقیقت پارلیمنٹ میں تمام اپوزیشن پارٹیوں کے پاس نواز حکومت سے مختلف کوئی بنیادی معاشی پالیسی نہیں ہے، تاہم ایک ایسا اہم ایشو ہے جو واقعی عام لوگوں کی زندگیوں کو متاثر کرکے عوامی مظاہروں کا باعث بن کر نواز حکومت کے وجود کے لئے خطرہ بن رہا ہے۔ صحت، تعلیم، پانی، نکاسی آب وغیرہ جیسے دیگر اَن گنت سماجی و معاشی مسائل کے علاوہ بجلی کے زخم اکثر و بیشتر عوامی غیظ و غضب کا باعث بنتے رہے ہیں۔  لیکن یہ عوامی مظاہرے زیادہ تر اِکادْکا اور الگ تھلگ ہوتے رہے ہیں۔ حکومت عارضی اقدامات کے ذریعے عارضی طور پر زیادہ بجلی سپلائی کرکے ان مظاہروں کو ٹھنڈا کر دیتی ہے لیکن یہ لوڈشیڈنگ کے عذاب اور سماج کی بجلی کی ضرورتوں کا کوئی مستقل حل نہیں ہے، عوام کی بدحالی جاری ہے۔ حکمران بڑے منصوبوں کی شیخیاں بگھار رہے ہیں اور ملک میں توانائی کی کمی کے خاتمے کی تاریخ دیتے جا رہے ہیں۔ بجلی کی اس کمی کی اصل وجہ بڑھتی ہوئی طلب ہے جسے موجودہ انفرااسٹرکچر اور پیداوار کی رفتار سے پورا نہیں کیا جاسکتا، لیکن مین اسٹریم میڈیا اور سیاسی اشرافیہ کی نعرے بازیوں میں مسئلے کی اصل وجہ کو تو زیربحث ہی نہیں لایا جاتا۔ پچھلی تین دہائیوں میں ایک بات ثابت ہو چکی ہے کہ بجلی اور دیگر سہولیات کی نجکاری نے سماج کو بنیادی ضروریات سے محروم کردیا ہے اور اکثریت کے پاس آئی پی پیز اور توانائی کی پیداوار میں سرمایہ کاری کرنے والے دوسرے سامراجی اور مقامی کارپوریٹ سیکٹر کے منافعوں کی ہوس کو پورا کرنے کی صلاحیت ہی نہیں ہے۔ اس پیداوار کا مقصد متمدن انسانی وجود کی بنیادی ضرورت کے اس کاروبار میں مداخلت کرکے بے تحاشا منافع کمانا ہے۔ نجکاری کے آغاز کے بعد بجلی کی پیداوار کو زیادہ سے زیادہ منافع خوری کی طرف موڑا گیا۔  1990ء کی دہائی میں نجی شعبے کی بجلی کی پیداوار اس وقت شروع ہوئی جب بے نظیر کی دوسری حکومت نے بجلی کے شعبے کو سامراجی منافع خور نجی شعبے یعنی آئی پی پیز کے لئے کھول دیا۔ نوازشریف، مشرف اور بعد کی دوسری حکومتوں نے اس پالیسی کو جاری رکھا، جس میں ان کے اپنے سرمایہ دار ٹولوں نے غریب آبادی سے بے رحم منافعے کشید کیے۔  فنانشل ٹائمز نے  1994ء میں نجی پیداوار کی طرف اس شفٹ کو ان الفاظ میں بیان کیا، ’’ورلڈ بینک کی معاونت سے (پاکستان نے) اپنی توانائی کے شعبے کی نجکاری کو پُرکشش شرائط کے ذریعے دلکش بنایا۔ سالانہ  12 سے  15 فیصد ریٹرن (روپے میں نہیں بلکہ ڈالر میں) کی ضمانت دی گئی، ٹیکس چھوٹ اور نجی فنڈنگ پر قرضہ دیا گیا، جو حکومت کے لئے زیادہ مہنگا تھا۔ سرمایہ کاروں کے لئے یہ ناقابل یقین حد تک پْرکشش تھا۔‘‘ ان سامراجی آئی پی پیز کے ساتھ طے پانے والے معاہدے واضح طور پر ان کارپوریٹ منافع خوروں کے مفاد میں تھے جنہوں نے اس وقت کے سیاست دانوں اور جرنیلوں کو نواز کر یہ ٹھیکے وصول کیے۔ ان حکومتوں نے ان سرمایہ کاروں کو گارنٹی دی کہ وہ بے تحاشا پیداواری صلاحیتیں تعمیر کریں اور وزارت خزانہ نے اس اضافی پیداواری صلاحیت کے لئے اتنی ہی ادائیگی کی گارنٹی دی، چاہے وہ اسے استعمال میں لائیں یا نہ لائیں۔ فنانشل ٹائمز مزید لکھتا ہے، ’’یہ ماڈل حکومت پاکستان اور عوام، دونوں کے لئے کارکردگی کے حساب سے خراب طریقے سے تعمیر کیا گیا تھا۔ حتیٰ کہ معاشی ترقی اور بجلی کی بہترین پیداوار کی کیفیت میں بھی حکومت کے لئے اس منصوبے کا خرچہ برداشت کرنا بہت مشکل تھا۔ لیکن چونکہ یہ دونوں کیفیتیں نہیں تھیں، اس لئے نجی شعبے کی توانائی کے خرچے کو برداشت کرنا بالکل ہی ناممکن ہوگیا۔ بیشتر نجی سرمایہ کاروں نے تیل سے چلنے والے پلانٹ تعمیر کیے کیونکہ یہ جلدی اور کم خرچ سے تعمیر ہو جاتے ہیں۔ متغیر لاگتیں اور صارفین کے لئے قیمتیں بہت زیادہ تھیں۔ اسی لئے بہت سے صارفین اپنی بجلی کے بل ادا نہیں کرسکتے۔‘‘  حکمران طبقات اپنی بے تحاشا دولت بینکوں میں ذخیرہ کر رہے ہیں جبکہ عوام محروم ہیں، ریاست ضخیم قرضوں میں غرق ہے اور اگر عالمی مالیاتی اداروں جیسے آئی ایم ایف اور ورلڈ بینک کے قرضے نہ ہوں تو فوراً ہی دیوالیہ ہوجائے۔ پاکستان کے گردشی قرضے بڑھتے ہوئے سود اور ڈالر کے مقابلے میں روپے کی گراوٹ کی وجہ سے بد سے بدتر ہوتے جا رہے ہیں۔  سرمایہ دارانہ نظام میں اس انتشار سے نکلنے کا کوئی راستہ نہیں ہے۔ جوں ہی ادائیگیاں رکتی ہیں آئی پی پیز پاور پلانٹس کو بند کرکے پورے پاکستان کو تاریکی میں ڈبو دیتے ہیں۔ عوام کو روزانہ کی بنیاد پر لوڈشیڈنگ کا سامنا کرنا پڑتا ہے، اس کے باوجود کہ ملک میں  35 فیصد زیادہ پیداواری صلاحیت موجود ہے۔ عوام کو اس خطے کی سب سے مہنگی بجلی کا بوجھ برداشت کرنا پڑ رہا ہے۔ پاکستان میں بجلی کی قیمتیں خطے میں سب سے زیادہ ہیں۔ یہاں فی یونٹ  0.13 ڈالر، بھارت میں  0.12ڈالر، چین میں  0.11 ڈالر اور بنگلہ دیش میں  0.09 ڈالر ہے۔ فرنس آئل ملک کی  40 فیصد، ہائیڈرو الیکٹرک ڈیمز  30 فیصد اور گیس  25 فیصد بجلی کی ضروریات پوری کرتی ہے۔  جہاں توانائی کی پیداوار میں مالی مشکلات ہیں وہیں اس کی تقسیم میں اس سے بڑا بحران ہے۔ اگر بجلی کی پیداوار میں اضافہ بھی کیا جاتا ہے تو گلی سڑی اور بوسیدہ ٹرانسمشن لائنیں اور ڈسٹری بیوشن انفرااسٹرکچر اس اضافی پیداوار کو اپنے اندر سمو نہیں سکتے۔ ریاست کو لوٹ لیا گیا ہے اور صرف قرضوں پر چل رہی ہے۔ اس میں اتنی مالیاتی صلاحیت ہی نہیں ہے کہ بجلی کی پورے ملک میں تقسیم کے لئے جدید خطوط پر انفرااسٹرکچر تعمیر کرے۔  اپنی موجودہ بوسیدہ حالت میں ڈسٹری بیوشن انفرااسٹرکچر مشکل سے ہی موجودہ پیداوار کو سنبھال رہا ہے۔ ٹرانسمشن لائنیں اور تاریں گل سڑ چکی ہیں اور مختلف سرمایہ دارانہ حکومتوں میں نہ تو کوئی ارادہ اور نہ ہی مالی صلاحیت ہے کہ انہیں اَپ گریڈ یا مرمت کرسکیں۔ حتیٰ کہ بڑے شہروں میں ٹرانسفارمر اوور لوڈ ہوجاتے ہیں اور اکثر بند ہوجاتے ہیں، جبکہ ریاست کے پاس ان کی مرمت کے لئے پیسے ہی نہیں ہیں۔ ٹرانسمشن انفرااسٹرکچر کی زبوں حالی کی کیفیت یہ ہے کہ نجی شعبہ بھی اس میں اتنی بڑی سرمایہ کاری سے کترا رہا ہے کیونکہ پاکستان جیسے غریب ملک میں اتنی مہنگی بجلی خریدنے کی صلاحیت بہت کم ہے اور منافع خوری میں لمبی تاخیر ہوگی۔ سی پیک کا سارا زور بھی ٹرانسمشن لائنوں کی بجائے توانائی کی پیداوار کے منصوبوں پر ہے۔ شمال سے جنوب کی طرف نئی ٹرانسمشن لائنیں بچھانے کے کچھ منصوبے ہیں لیکن پاکستانی ریاست کے بڑھتے ہوئے قرضے اور مالیاتی خسارے کے بحرانوں کی وجہ سے ان منصوبوں کی کامیابی کے امکانات بہت کم ہیں۔  چینی کارپوریٹ سرمایہ کار یہاں سستی بجلی دینے کے لئے نہیں بلکہ زیادہ سے زیادہ منافع کشید کرنے کے لئے آئے ہیں۔ یہ پاکستان میں سرمایہ داری کی مسخ شدہ اور غیر ہموار صنعتی اور معاشی ارتقا کی ایک اور مثال ہے کہ توانائی کی پیداوار اور اس کی ٹرانسمشن اور تقسیم کے درمیان کوئی ربط ہی نہیں ہے۔ ترقی کے ان تمام ڈھکوسلوں کے باوجود انفرااسٹرکچر کے لئے کوئی ایک بھی منصوبہ نہیں ہے جس کے ذریعے بجلی سے محروم بلوچستان کے لئے بجلی مہیا کی جاسکے، جہاں بجلی کی ٹرانسمشن کی صلاحیت  500 میگا واٹ سے زیادہ نہیں ہے۔ بجلی کی طلب سالانہ  10 فیصد کے حساب سے بڑھ رہی ہے جو توانائی کے بحران کو مزید گہر ا کر رہی ہے۔ یہ بات درست ہے کہ پاکستان کو سستے فوسل فیول جیسا کہ قدرتی گیس اور کوئلے سے بجلی پیدا کرنے کی ضرورت ہے، بجائے فرنس آئل اور ڈیزل کے، جس سے توانائی کے شعبے میں گردشی قرضے بڑھ گئے ہیں اور قومی معیشت پر بوجھ بن گئے ہیں۔ لیکن اس نظام میں تمام دوسرے کاروباروں کی طرح بجلی بھی صرف منافع خوری کے لئے پیدا کی جاتی ہے نہ کہ سماج کی ضروریات کو پوری کرنے کے لئے۔ حقیقت یہ ہے کہ بینکاروں، بیرونی اور مقامی سرمایہ کاروں اور بورڑوا سیاست دانوں کے سرمایہ دارانہ کاروباروں کے منافعوں کا تحفظ صرف اس نظام کے تحت ہی ہو سکتا ہے جو محنت کشوں اور مزدوروں کا خون نچوڑ رہا ہے۔ اِس معیشت اور ریاست کی تعمیر ہی ان مراعات یافتہ طبقات کے مفادات کی تحفظ کے لئے کی گئی ہے۔ سماج کو سستی اور کارآمد بجلی کی فراہمی کے لئے بجلی کے پیداواری نظام اور اسے کنٹرول کرنے والے مالیاتی اور بینکنگ نظام کو سرمایہ داروں سے ضبط کرنا ہوگا، لیکن ایسا صرف مزدوروں کے جمہوری کنٹرول اور انتظام میں چلنے والی ریاست ہی کرسکتی ہے۔ یہ ایک ایسا سماج ہوگا جہاں تمام تر پیداوار، خدمات اور زرعی شعبے امیروں کی منافع خوری کے لئے نہیں بلکہ انسانی ضروریات کی تکمیل کے لئے کام کریں گے۔