نرم و ملائم ہاتھ۔۔ خواتین کے حْسن کی علامت

حسن آراء
ملک وال: چہرے کی دیکھ بھال کے چکر میں ہم اکثر اپنے ہاتھوں کو یکسر بھول جاتے ہیں۔ ہاتھوں کو نرم و ملائم بنانے کے لئے آپ گھریلو نسخہ استعمال کرسکتی ہیں۔ اس کے لئے بہت زیادہ محنت کی ضرورت بھی نہیں پڑے گی۔ اکثر ہم چہرے کی دیکھ بھال میں لگ جاتے ہیں اور جسم کے دوسرے حصوں کو یکسر نظرانداز کردیتے ہیں جس کا زیادہ اثر ہمارے ہاتھوں اور پیروں پر پڑتا ہے۔ آپ اپنے پیر تو چھپا سکتی ہیں لیکن اپنے ہاتھ کبھی نہیں چھپا سکتیں، اس کے علاوہ جب آپ اپنی دوست خواتین یا رشتے داروں سے ہاتھ ملاتی ہیں تو آپ کے ہاتھوں کی سختی کی وجہ سے آپ کی شخصیت پر بہت بُرا اثر پڑتا ہے، اس لئے آپ اپنے ہاتھوں کی رنگت کو نکھاریں اور ان کو نرم و ملائم بنائیں جس کے لئے آپ گھریلو نسخے استعمال کرسکتی ہیں اور ہاتھوں کو نرم و ملائم بناسکتی ہیں۔ کھردرے اور جھریوں والے ہاتھ پوری شخصیت پر بُرا اثر ڈالتے ہیں جس سے شخصیت اور وقار مجروح ہوتا ہے۔ جس طرح چہرے کو حفاظت کی ضرورت ہوتی ہے، اسی طرح ہاتھوں کو بھی حفاظت اور توجہ کی ضرورت ہوتی ہے۔ ہاتھوں کی پشت زیادہ حساس اور نرم ہوتی ہے، اس لئے یہ زیادہ خراب ہو کر بدنما لگنے لگتی ہے۔ ہتھیلی کی پشت کی جلد پر چکنائی والے غدود نہیں ہوتے، اس لئے اسے جسم کے دوسرے حصوں کی نسبت زیادہ چکنائی کی ضرورت ہوتی ہے اور مطلوبہ چکنائی نہ ملنے کی صورت میں ہاتھوں کی جلد خراب ہوجاتی ہے۔ اگر ہاتھوں پر میل کچیل وغیرہ لگ جائے تو ان پر کیلے کے چھلکوں کو بار بار اور آرام آرام سے رگڑیے، اس سے میل کچیل ختم ہوجائے گا اور ہاتھ خوبصورت دکھائی دیں گے۔ ہاتھوں کی حفاظت کے لئے آپ مخصوص کریمیں گھر میں بھی تیار کرسکتی ہیں۔ ایک انڈے کی سفیدی لیں جس میں ایک کپ روغن بادام مکس کرلیں، پھر اس میں ایک چمچہ عرقِ گلاب، آدھا چمچہ ٹنکچر اور ایک لیموں کا رس ملا کر اچھی طرح پھینٹ لیں۔ اس آمیزے سے صبح شام ہاتھوں کا مساج کرنے سے واضح تبدیلی آجائے گی۔ صابن یا ڈیٹرجنٹ کا زیادہ استعمال بھی ہاتھوں کے لئے نقصان دہ ہوتا ہے، اس لئے ہاتھوں کو دھونے کے بعد انہیں کسی اچھے موئسچرائزر کی ضرورت ہوتی ہے، تاکہ صابن کے مضر اثرات سے بچا جاسکے۔ اس کے لئے رات کو سونے سے پہلے کچھ دیر موئسچرائزر لگا کر ہاتھوں کا مساج کرنا چاہئے اس سے بھی ہاتھ نرم ہوجاتے ہیں۔ خواتین جب سبزی بناتی ہیں تو ان کے ہاتھوں پہ دھبے سے پڑ جاتے ہیں خاص طور سے پالک، میتھی، چقندر اور باقلہ کی پھلیاں بنانے سے کئی دن تک ہاتھ صاف نہیں ہوتے۔ کچھ خواتین کی جلد بہت حساس ہوتی ہے، اس لئے ان کی جلد پر بھی داغ پڑجاتے ہیں۔ اس کا آسان حل یہ ہے کہ آپ بازار سے دستانے خریدیں اور انہیں دونوں ہاتھوں پر پہن کر سبزی بنائیں۔ پالک وغیرہ آپ کسی تختے پر رکھ کر کاٹ لیں۔ اب تو پلاسٹک کے کٹنگ بورڈ بھی عام ملتے ہیں۔ آپ پانی میں تھوڑا سا سرکہ ملا کر ہاتھ دھو لیں اس سے دھبے کم ہوجائیں گے۔ اس کا دوسرا حل یہ ہے کہ موٹی چینی ایک چمچہ تھوڑے سے لیموں کے رس میں ڈال کر دونوں ہتھیلیوں سے خوب اچھی طرح رگڑیں۔ جب چینی جب اچھی طرح گھل جائے تو ہاتھ دھو لیں، اس سے ہاتھوں کا کھردرا پن ختم ہوجائے گا۔ یہ عمل رات کو سونے سے پہلے کریں۔ اس کے علاوہ اگر آپ عرقِ گلاب میں تھوڑی سی گلیسرین اور تھوڑا سا لیموں کا رس ملا کر باورچی خانے میں رکھ لیں جس کے بعد برتن دھونے اور سبزی کاٹنے کے بعد ہاتھ دھو کر یہ آمیزہ لگالیں تو اس سے بھی ہاتھ نرم و ملائم ہوجائیں گے۔ تھوڑے سے دودھ میں لیموں کا رس ملائیں، جب دودھ پھٹ جائے تو اسے اچھی طرح ہاتھوں پر دس منٹ تک لگائیں، اس کے بعد دونوں ہاتھ اچھی طرح دھو لیں۔ اس سے بھی ہاتھ نرم اور صاف ہوجاتے ہیں۔ اگر ہاتھوں پر دھبے زیادہ ہوں تو اس میں تھوڑا سا آٹا بھی ملا لیں، لیکن یاد رہے کہ آٹا بھوسی والا ہو۔ اس آمیزے کو ہاتھوں پر اچھی طرح مَل کر اتار دیں تو سارا میل اتر جائے گا۔ خواتین اپنے دونوں ہاتھوں پر پیٹرولیم جیلی بھی لگا سکتی ہیں۔ اس کے ساتھ ساتھ گھیکوار کا گودا لگانے سے بھی ہاتھ نرم و ملائم ہوجاتے ہیں۔ اگر آپ کو یہ دستیاب نہ ہو تو دودھ کی بالائی ہاتھوں پر مل لیں۔ اسی طرح کپڑے دھونے کے بعد بھی ہاتھوں پر عرقِ گلاب، گلیسرین اور لیموں والا لوشن لگائیں، اس سے نہ صرف آپ کے ہاتھوں کے دھبے ختم ہوجائیں گے، بلکہ آپ کے ہاتھ نرم و ملائم بھی رہیں گے۔
خوبصورت ہاتھوں کے لئے چند ٹپس:
ہاتھوں کو مضبوطی سے بند کریں پھر ہاتھ کھول کر زور سے انگلیوں کو پھیلائیں پانچ بار یہی عمل کریں۔
ہاتھوں کو کلائیوں پر ادھر ادھر زور سے حرکت دیں، لیکن خود ہاتھوں کو ڈھیلا چھوڑے رکھیں۔
گھریلو کام کاج یعنی سبزی کاٹتے ہوئے، برتن اور کپڑے دھوتے وقت ہاتھوں پر باریک ربر کے دستانے پہننا نہ بھولیں۔
سرد موسم میں جتنی بار ہاتھ دھوئیں، اتنی ہی بار ان پر کریم یا لوشن ضرور لگائیں۔
موسم سرما میں کام کاج کی وجہ سے ہاتھ کھردرے اور سخت ہوجاتے ہیں، اس لیے رات کو سونے سے پہلے اپنے ہاتھ صابن اور نیم گرم پانی سے دھولیں، ہاتھوں پر کولڈ کریم ملیں اور پھر سوتی دستانے پہن کر سو جائیں۔ صبح اٹھ کر آپ کو اس عمل کے بہترین نتائج کا علم ہوجائے گا۔
اگر آپ کے ہاتھوں کی جلد سیاہ پڑ گئی ہے تو رات کو سونے سے پہلے ہاتھوں پر لیموں کا عرق ملیں، ہاتھوں کو گورا کرنے کے لئے لیموں کا رس اکسیر کی حیثیت رکھتا ہے۔