ماہم جاوید
خوبصورت نظر آنا ہر عورت کی خواہش ہے، بعض خواتین ایسی ہیں جو خود پر توجہ دیتی ہیں اور بعض ایسی ہیں جوکہ مصروفیات کی وجہ سے اپنے اوپر توجہ نہیں دیتی اور سب سے اہم چیز نظرانداز کرتی ہیں وہ ہے ان کے بال اور ہیئر اسٹائل۔ ہر خاتون اپنی پسند کے مطابق اپنے بالوں پر تجربات کرتی ہیں لیکن پیشہ ور خواتین پونی ٹیل سے کام چلاتی ہیں اور جب کبھی کسی پارٹی وغیرہ میں جانا ہو تو فیشن کے طور پر بال کھلے چھوڑ دیتی ہیں اور محفل میں جانا ہو تو وہ عموماً جوڑے سے کام چلاتی ہیں۔ اس حقیقت کو جھٹلایا نہیں جا سکتا کہ بال کسی بھی عورت کے حسن کا سب سے اہم پہلو ہے۔ عورت اپنے بالوں کے انداز کو بدل کر اپنی پوری شخصیت کو بدل سکتی ہیں۔ ہیئر کٹ عورت کی شخصیت میں بڑی تبدیلی لاسکتا ہے اور انہیں پُراعتماد اور چہرے کے نقوش کو بھی تقویت بخشتا ہے۔ تحقیق سے بات سامنے آئی ہے کہ خواتین اس فکر میں مبتلا رہتی ہیں کہ ان کے بال کیسے نظر آ رہے ہیں کوئی حیران ہوکہ خواتین اپنے بالوں پر اتنا پیسہ اور وقت کیوں برباد کرتی ہیں؟ صرف اچھا نظر آنے کے لئے انہیں بلکہ بال آپ کی پوری شخصیت کو سنوارتے ہیں۔
آج کل لڑکیاں جوکہ 14 سے 25 سال کی عمر تک پہنچتی ہیں ان میں یہ دیکھا جارہا ہے کہ وہ اپنے بالوں پر کافی توجہ دیتی ہیں اور بالوں کے لئے خاص محتاط رہتی ہیں۔ بالوں کو مضبوط بنانے کے لئے اور طرح طرح کے ہیئر اسٹائل بنا کر اپنی شخصیت کو نکھارتی ہیں بالوں کو لمبا کرنے اور ان کو مضبوط بنانے کے لئے ایک گھریلو ٹوٹکہ ہے جس سے بالوں کی مضبوطی میں اضافہ ہوگا بال لمبے گھنے اور چمکدار بھی ہوں گے۔
دہی: 4 سے 5 چمچ، میتھی دانہ: 2 سے 3 چمچہ۔ دہی میں میتھی دانہ ڈال کر دو دن کے لئے ڈھک کر رکھ دیں اور پھر اس مکسچر کو آدھے گھنٹے کے لئے بالوں پر لگا لیں۔ پھر شیمپو سے اچھی طرح دھو لیں یہ عمل ہفتے میں ایک بار کریں۔ اس سے بال لمبے گھنے اور چمکدار ہوں گے۔
خواتین اپنی خوبصورتی میں اضافہ کرنے کے لئے کئی طرح کے ہیئر کلرز کا استعمال کرنا شروع کر دیتی ہیں لیکن بار بار کلر کروانے سے بال نہ صرف کمزور ہوتے ہیں بلکہ آپ کی شخصیت کو پُراعتماد بنانے کی بجائے جزبز کر دیتے ہیں کہ آیا یہ کلر آپ پر سوٹ بھی کر رہا ہے کہ نہیں۔
یہ بات بھی عام ہوچکی ہے کہ خواتین اپنے ہی اسٹائل سے کافی عرصہ نکال دیتی ہیں اور پھر جب وہ دوسرا اسٹائل بنانے کی کوشش کرتی ہیں تو وہ اس سے مطمئن نظر نہیں آتی۔
یہ بات بھی دیکھنے میں آئی ہے کہ جن خواتین کے بال لمبے ہوتے ہیں وہ ایک ہی اسٹائل میں رہنا پسند کرتی ہیں۔ ان کو دوسرا اسٹائل بنانا اچھا نہیں لگتا اور جن کے بال چھوٹے ہوتے ہیں وہ اپنے بالوں سے کئی طرح کے اسٹائل بنا لیتی ہیں اور کبھی ٹوئسٹ فرینچ بنا لیتی ہیں۔
کہا جاتا ہے کہ یہ ذہین بھی ہوتی ہیں مغربی ممالک میں شاذونادر ہی خواتین کے بال لمبے دیکھنے میں آتے ہیں۔ ان خواتین کو اندازہ ہوتا ہے کہ بڑھتی ہوئی عمر کے ساتھ ساتھ بالوں کی غذائی ضروریات پوری نہ ہونے کے باعث ان کی نشوونما میں واضح فرق نظر آتا ہے چنانچہ خوبصورت انداز سے بالوں کی کٹنگ کروا لی جاتی ہے۔
اگر مغربی ممالک کے ساتھ پاکستان کا جائزہ لیا جائے تو دیکھنے میں آتا ہے کہ پاکستان کی خواتین بال لمبے رکھنے کو عزت اور وقارکی علامت سمجھتی ہیں اور خود کو محفوظ بھی۔ لیکن جیسے لباس میں رنگوں کے چناؤ کی اہمیت ہے اسی طرح سے بالوں کی اچھی نشوونما اور ان کا خیال رکھنا بھی ویسا ہی اہم ہے۔
آخر میں یہ کہنا چاہوں گی کہ خواتین صرف اپنے چہرے کپڑوں پر توجہ زیادہ دیتی ہیں لیکن وہ اب سب کے ساتھ ساتھ بالوں پر بھی توجہ دیں تو اس طرح سے ان کی شخصیت میں اور نکھار آئے گا۔
خوبصورت ہیئر اسٹائل لائیں شخصیت میں نکھار
