سجدۂ آدم سے انکار پر
خدا نے خلقتِ آدمؑ پہ جب توجہ کی
تو اس نے حضرتِ آدم کو پیدا فرمایا
کہا فرشتوں سے سجدہ کرو تو سب نے کیا
بجز معلم الملکوت جو تھا کبر سے پُر
کہا نہیں یہی بھلا کیسے میں کروں مولا
کہ مرتبہ مرا آدم سے ہے بلند بہت
ترے حضور میں لاکھوں برس سے حاضر ہوں
ترے فرشتوں کا استاد بھی رہا ہوں میں
مقامِ شرم ہے میرے لئے خدائے بزرگ
کہ تیرے کہنے پہ سجدہ کروں میں پتلے کو!
حضورِ قدسِ دوعالم تھی پہلی نافرمانی
خدا جلالتِ ربی سے پر غضب ہو کر
بہت جلال میں آ کر اسے کہا ’’شیطان‘‘
تجھے مجال یہ کیسے ہوئی، ہے انکاری
جو میرے بندے ہیں اس نام سے پکاریں گے
تیرے غرور نے تجھ کو کیا ہے کالعدم
میں تجھ کو راندۂ درگاہ کررہا ہوں ابھی
ترے مقام سے معزول کررہا ہوں تجھے
کہ تو مقامِ اعلا تک نہ آسکے گا کبھی!
تری سزا ہے یہی تاکہ رہتی دنیا تک
یہ اک اصول کی صورت میں لوگ اپنائیں
ترا جو نام پکاریں تجھے کہیں ’’شیطان‘‘
کہ تو ہے دشمنِ آدم، ہے دشمن حوا
ابد تلک تری آدم سے دشمنی ہوگی
اسی اصول پہ دنیا میرے بھری ہوگی
مشرقؔ صدیقی
