۔2017ء۔ ٹرمپ، شمالی کوریا اور روہنگیا خبروں میں رہے

ء2017 کے دوران امریکی صدر ڈونلڈ ٹرمپ کے متنازع اعلانات، شمالی کوریا کے جوہری تجربات اور روہنگیا مسلمان خبروں میں رہے۔ ایک رپورٹ کے مطابق برطانیہ، امریکہ اور دیگر ممالک میں دہشت گردی کے واقعات بھی دیکھنے میں آئے۔ 20 جنوری 2017ء کو ڈونلڈ ٹرمپ نے امریکہ کے 45 ویں صدر کی حیثیت سے حلف اٹھایا جس کے بعد دنیا بھر میں امریکی صدر کے خلاف مظاہروں کا نہ ختم ہونے والا سلسلہ شروع ہوا جو آج بھی جاری ہے۔ مئی میں برطانوی شہر مانچسٹر میں کنسرٹ کے درمیان حملے میں 22 افراد ہلاک اور ایک سو زخمی ہوگئے۔ بھارت اور چین کی فوج کے درمیان متنازع سرحد ڈوکلام پر جھڑپیں ہوئیں۔ میانمار میں ایک ہزار سے زائد مسلمانوں کا قتل عام، کئی دیہات کو نذرآتش کیا گیا جبکہ 7 لاکھ روہنگیا مسلمان بنگلا دیش نقل مکانی کرنے پر مجبور ہوئے۔ نومبر میں عراق اور ایران کی سرحد پر 7.3 کی شدت کے زلزلے سے 530 افراد جاں بحق اور 70 ہزار بے گھر ہوئے۔ زمبابوے کے صدر رابرٹ موگابے نے فوج کی مداخلت کے بعد 37 سال بعد اپنے عہدے سے استعفیٰ دے دیا۔ یمن میں جاری لڑائی میں باغیوں نے سابق صدر علی عبداللہ صالح کو قتل کردیا۔ نومبر میں مصر کی ایک مسجد میں دھماکے سے 305 نمازی شہید ہوگئے۔