یاد ہے آج تک مجھے

کتنی تھی لاجواب وہ

مستِ مئے شباب وہ

یاد ہے آج تک مجھے

پیکر صد شباب وہ

ماہِ دو ہفتہ کی طرح

رنگ میں تھی شہاب وہ

اپنی مثال آپ تھی

رکھتی نہ تھی جواب وہ

حسن تھا اُس لاجواب

ایسی تھی انتخاب وہ

دن کا سماں تھا ہر طرف

شب میں تھی آفتاب وہ

رکھتی تھی انگ انگ میں

نشۂ بے حساب وہ

آنکھوں کی بھی زبان سے

کرتی کبھی خطاب وہ

کھل کے بَرَستی تھی مدام

ایسی تھی اک سحاب وہ

لگتی تھی جاگنے میں یوں

جیسے ہو کوئی خواب وہ

نشے میں لگتی تھی، مگر

پیتی نہ تھی شراب وہ

پڑھتا تھا جس کو بار بار

ایسی تھی اک کتاب وہ

جسم ہی کیا، کہ روح تک

کرتی تھی بار یاب وہ

لگتی تھی مجھ کو سر بہ سر

مثل شراب ناب وہ

نرمی و نازکی میں تھی

یاسمین و گلاب وہ

پڑھتا تھا جب بھی میں اُسے

لگتی تھی نئی کتاب وہ

وَصل کے بعد سر بہ سر

لگتی کھلا گلاب وہ

دل یہی چاہتا تھا بس

پڑھتا رہوں کتاب وہ

عالم قرب و وصل میں

لگتی تھی محوِ خواب وہ

——————————–
خیام العصر محسن اعظم محسنؔ ملیح آبادی

——————————–