ولادیمیر پیوٹن کی چینی صدر کو دورہ روس کی دعوت

روسی صدر ولادیمیر پوٹن نے اُمید ظاہر کی ہے کہ چینی صدر شی چن پنگ آئندہ سال روس کا سرکاری دورہ کریں گے۔ دونوں رہنماؤں کی ویڈیو کانفرنس کے ذریعے بات چیت ہوئی جس کو سرکاری ٹیلی ویژن پر نشر کیا گیا اور اس میں روسی صدر نے چین کے ساتھ فوجی تعاون میں اضافے کی خواہش کا اظہار کیا ہے۔ ولادیمیر پیوٹن نے چینی صدر کو دوست کہہ کر مخاطب کیا اور کہا کہ جناب چیئرمین، ہم آپ کے آنے کی توقع کررہے ہیں، ہم اگلے موسم بہار میں ماسکو کے سرکاری دورے پر آپ کے منتظر ہیں، اس سے ظاہر ہوگا کہ دُنیا کے اہم مسائل پر روس اور چین کے مضبوط تعلقات ہیں۔ چینی صدر نے اپنے روسی ہم منصب کو کہا کہ یوکرین میں امن کے حوالے سے مذاکرات کا راستہ آسان نہیں ہوگا اور چین اس مسئلے پر اپنے بامقصد اور منصفانہ مؤقف پر قائم رہے گا۔ شی جن پنگ نے کہا کہ چین اور روس بین الاقوامی معاملات میں ہم آہنگی اور تعاون کو بڑھانا چاہتے ہیں، انہوں نے روس پر زور دیا کہ وہ یوکرین کے تنازع پر مذاکرات کیلئے رضامندی ظاہر کرے۔ دونوں رہنماؤں نے روس کے یوکرین پر حملے سے چند دن قبل فروری میں ”لامحدود“ اسٹرٹیجک پارٹنرشپ پر دستخط کئے تھے۔ ویڈیو کانفرنس کے دوران پیوٹن نے کہا کہ انہوں نے مغرب کے اثرورسوخ اور دباؤ کے باوجود عالمی جغرافیائی سیاسی منظرنامے میں چین کے ساتھ اپنے اسباب اور طریقہ کار کے حوالے سے یکساں خیالات کا اظہار کیا ہے۔