حصولِ منزل مقصد اگر بدلتے ہیں
قدم قدم پہ نئے ہم سفر بدلتے ہیں
یہ خوف بھی ہے کہ خانہ بدوش یا کچھ اور
پرندے عہدِ خزاں میں شجر بدلتے ہیں
انہیں ملے نہ ملے کچھ دعائیں دیتے ہیں
فقیر رکتے نہیں ہیں وہ در بدلتے ہیں
جواب جھوٹ کا ہے، انحراف ہے سچ سے
بڑے کمال سے وہ ہر خبر بدلتے ہیں
خیال خاطرِ احباب زندہ رکھا ہے
مرے خلوص سے پھر کیوں نظر بدلتے ہیں
نبھانا رشتوں کو شیشہ گری سے کم تو نہیں
کہ لوگ رسم دعا دیکھ کر بدلتے ہیں
مسافتوں کو طوالت ہو، دور ہو منزل
تو خواہشوں کے مسلسل بھنور بدلتے ہیں
سروشؔ بھول گئے تھے یہ شوقِ منزل میں
کہ کارواں ہی نہیں راہ بر بدلتے ہیں
نوید سروشؔ
