غزلیں

نظامِ کفر بھی ناکام ہونے والا ہے
خدا کا دین بس اب عام ہونے والا ہے

جنوں کا چاروں طرف نام ہونے والا ہے
نظامِ اہل خرد خام ہونے والا ہے

تو مشکلیں بھی کوئی راہ میں نہ آئیں گی
جو سوچ لیجئے کہ وہ کام ہونے والا ہے

یہی یہود و نصاریٰ کو خوف ہے لاحق
بلندیوں پہ پھر اسلام ہونے والا ہے

جو آج کل ہیں حیا اور حجاب کے دشمن
تماشا ان کا سرِ عام ہونے والا ہے

نظامِ نَو تو بظاہر کچھ ایسا لگتا ہے
خود اپنے نام سے بدنام ہونے والا ہے

امید ہے یہی دنیا کو عنقریب خلیلؔ
ہر ایک ظلم کا انجام ہونے والا ہے

———————–

خلیل احمد خلیلؔ 

———————–

اک خلش سی مجھے مسلسل ہے
کس کے ہاتھوں میں مرا پل پل ہے

تجھ کو پا کر بھی نامکمل ہوں
مجھ کو کھو کر بھی تو مکمل ہے

میری آنکھوں میں اک سکوت سہی
میری سوچوں میں کتنی ہلچل ہے

ایک دعویٰ مجھے بھی ہے لیکن
جھوٹ تیرا بھی کچھ مدلل ہے

ایک منظر کسی کی آنکھوں میں
ایک مدت سے نامکمل ہے

خود مجھے بھی پتا نہیں اس کا
کس کی حسرت کا یہ تسلسل ہے

کیا سناؤں تمہیں مرے ہمدم
عشق کی داستاں مفصل ہے

———————–

شاہین زیدی

———————–