اے مری جان ذرا وقت کی زنجیر کو دیکھ
جس کا ہر حلقہئ سنگین ہے زنداں کی مثال
قید ہیں جس میں تمناؤں کے معصوم پرند
جس میں مغموم ہیں امکان کے دزدیدہ چراغ
آ کبھی درد کی خاموش سزا سے نکلیں
آ کبھی خوف کی پُرہول فضا سے نکلیں
آ کبھی صورتِ حالات سے ٹکرا جائیں
آ کبھی ہجر کے لمحات سے ٹکرا جائیں
پھونک ڈالیں یہ خرافات کا پندارِ قدیم
توڑ ڈالیں یہ روایات کی دیوارِ قدیم
اپنی تنہائی کو کیوں شہر میں بدنام کریں
اپنے احوال کا اظہار سرِعام کریں
آگ سی آگ لگی ہے سرِ انفاس یہاں
میں اکیلا ہوں نہیں کوئی مرے پاس یہاں
صورتِ عشق کبھی خواب نہیں ہوتی ہے
شاخ جل جائے تو شاداب نہیں ہوتی ہے
آرزو اب کسی احوال کی محتاج نہیں
خواہشِ وصل مہ و سال کی محتاج نہیں
کیف آگیں ہے ابھی آنکھ سخن زندہ ہے
ایک اُمید کی موہوم کرن زندہ ہے
رات زندہ ہے، ابھی میرا بدن زندہ ہے
خواجہ رضی حیدر
